DILI (timorpost.com) – Ministru Turizmu Komérsiu no Indústria (MTKI), José Lucas do Carmo, hatete sira prepara ona dekretu lei hodi selu taxa ba fatin Turizmu lokál sira ne’ebé eziste iha Timor-Leste.
“Ha’u informa ba Primeiru Ministru kona-ba dekretu lei balun atu estabelese Autoridade Nasionál ba Turizmu nian, no mós dekretu lei ida oinsá atu halo restaurasaun ka dada taxa ba fatin Turizmu sira,” nia hateten hafoin enkontru semanál ho Primeiru Ministru (PM), Taur Matan Ruak, iha Palásiu Governu Segunda (24/10).
Nia dehan, fatin Turístiku sira iha rai laran durante ne’e seidauk regula, entaun agora ne’e tenke regula ona, atu nune’e bele fó espasu ba Turizmu doméstiku sira ne’e bele dada ema mai no bele utiliza fundu sira ne’e.
“Tanba ida ne’e mak durante ita laiha bazet, ho ida ne’e mak ohin ha’u informa ba Primeiru Ministru, Taur Matan Ruak, nune’e mós ko’alia kona-ba Ró Kruzeiru ninian,” hateten Lucas.
Governante ne’e reforsa, planu atu dada fali Ró Kruzeiru mai, tanba Ró ne’e foin daudaun mai, agora kontinua planu sei halo koordenasaun nafatin atu lori fali Ró Kruzeiru mai hodi vizita Timor-Leste.
“Tanba parte ida oinsá ita engaza fali ita-nia Turista doméstiku ka turista Nasionál no Internasionál atu mai ita-nia rai hodi vizita ita-nia fatin Turístiku sira ne’e,” deklara nia.
Atu hakotu nia subliña, tanba ne’e ohin nia parte ko’alia Asuntu lubuk ida ho Primeiru Ministru, no planu sei halo hotu informasaun sira ne’ebé ohin hato’o ba Xefe Governu.
1,550 total views, 12 views today
Bele hare Video Seluk :