DILI (timorpost.com) – Primeiru Ministru (PM), Taur Matan Ruak, bandu Eis Titulares no Membru Governu sira atu simu subsídiu fim do ano 200 USD, ne’ebé atu fahe ba kada uma-kain iha fulan Dezembru.
Ministru Prezidensial Konsellu Ministru, Fidelis Magalhães, dehan Konsellu Ministrus hala’o sorumutuk iha Palásiu Governu aprova projetu Dekretu-Lei ne’ebé prosede ba alterasaun dahuluk ba Dekretu-Lei n. 37/2022, loron 25 fulan-Maiu, kona-ba subsídiu fim do ano ba uma-kain sira. Projetu Dekretu-Lei ne’e aprezenta husi Primeiru-Ministru, Taur Matan Ruak.
“Subsídiu ne’e nia natureza mak universál ba iha ninia implementasaun, agora so iha esesaun ne’e mak ba iha membru oragaun de soberania no eis titulares,” dehan Fidelis, hafoin Konsellu Ministrus iha Palásiu Governu, Kuarta (12/10).
Fidelis reforsa, dekretu lei ne’e aprova ona iha semana kotuk no seidauk bele haruka ba Prezidente Repúblika, atu foti desizaun tanba sei hadi’a parte balun husi dekretu lei ne’e.
“Iha semana kotuk ita boot sira husu atu halo diskusaun kle’an ba dekretu lei, ita hatán por alto jerál maibé ita seidauk iha ligasaun ho parte redasaun nian, no ohin ita aprova ho alterasaun sei haruka kedas ba Prezidente Republika, José Ramos Horta, hodi halo aprovasaun,” hakotu nia.
Fó hanoin fali katak, Antes ne’e Primeiru Ministru (PM), Taur Matan Ruak, komfirma nia parte sei la simu suisídiu 200 USD iha fim do ano tinan 2022.
“Se mak lakoi simu bele entrega fali ba ema ne’ebé presiza, por ezemplu ha’u la simu, tanba ne’e bainhira provedoria lakoi simu bele entrega fali ba ema ki’ak sira,” dehan Primeiru Ministru, Taur Matan Ruak, hafoin enkontru ho Xefe Estadu iha Palasiu Prezidenziál, Bairru-Pité, Kinta (06/10).
Matan Ruak subliña, iha subsídiu fim do ano ne’ebé ho karakter universál bainhira iha sidadaun balun ne’ebé lakoi simu bele fó fali ba sidadaun sira ne’ebé presiza.
“Maibé ha’u haree balun ne’e ibun mak ko’alia maibé foti tau daudaun iha bolsu, tanba ha’u uluk Prezidente Republika, ha’u kontra pensaun vitalisia, maibé ha’u foti hodi fó bolsa estudu ba joven sira, entaun sira lakoi simu subsídiu ne’e bele halo tuir ida ne’e,” nia hakotu.
1,030 total views, 3 views today
