DILI (timorpost.com) — Xefe Governu preokupa situasaun joven Timoroan sira iha Portugál, ne’ebé iha semana kotuk Prezidente Portugal, Marcelo de Sousa Rebelo, tun direita ba Jardín Martin Moniz ho kalan oras (22.00 Portugal), hodi observa direita kondisaun Timoroan sira nian.
Nia hatete, preokupa loos ho situasaun joven sira nian iha Portugál, portantu triste loos sira ba iha rai ne’ebé organizadu, sira ba iha ne’ebá, depois hetan situasaun ida difisil duni.
“Ita daudaun ne’e akompaña hela, primeiru ha’u hakarak identifika, sé mak husik sira ba no kuandu sira ba iha duni kontratu ruma ka, la’o naran de’it oinsá. Husi ne’e ita sei haree kona-ba saida mak ita bele ajuda,” nia promete hafoin enkontru ho Xefe Estadu iha Palásiu Prezidensiál, Bairru-Pité, Kinta (06/10).
Tanba ne’e nia husu ba joven sira atu pasiénsia uitoan, tanba hanesan hotu-hotu hatene kona-ba nasaun ne’ebé Estadu ho Governu laiha akordu, ne’e komplikadu liu, mezmu sira ne’ebé iha akordu, ne’e mós sei tuir prosesu ida, sá tan ida ne’ebé mak laiha akordu.
Kona-ba akordu ne’e agora Timor-Leste ho Austrália no Korea do Súl, restu Governu ho Estadu tenta atu hetan akordu, hodi asegura diretu, regalia, priviléjiu ne’ebé iha sidadaun Timoroan sira iha diretu.
“Agora sei ida ne’e, protesaun laiha, tanba ita entre Governu ho Governu laiha akordu, ne’e ita bolu dehan inisiativa sidadaun nian. Nune’e tuir lei hatete de’it katak, sidadaun ne’ebé deside aan atu ba, husi ne’e nia rasik mak resposabiliza ninia aan totalmente, ita-nia problema mak ida ne’e,” PM Taur hakotu.
2,907 total views, 3 views today
Bele hare Video Seluk :