DILI (timorpost.com) — Prezidente Eletrisidade Timor-Leste, Empreza Públiku (EDTL,E.P), Paulo da Silva, ho membru Konsellu Administrasaun relata dezafiu no progresu servisu ne’ebé durante sira halo iha sira-nia mandatu, ba Prezidente Repúblika (PR), José Ramos Horta.
“Ohin membru Konsellu Administrasaun husi EDTL,EP mai partilla ho Prezidente Repúblika kona-ba serbisu ne’ebé EDTL halo, depois transforma husi diresaun jerál mai empreza públiku ne’ebé hahú iha tinan kotuk, entaun ita relata ba PR kona-ba progresu ne’ebé ita halo no inisiativa ne’ebé ita iha, para mellora di’ak liután serbisu sira iha eletrisidade nian,” Prezidente EDTL dehan hafoin remata enkontru ho Xefe Estadu, iha Palásiu Prezidensiál, Bairru-Pité, Kuarta (05/10)..
Nia subliña, inklui hato’o kona-ba progresu sira ne’ebé iha, nune’e mós reseita ne’ebé EDTL hetan kobertura ba populasaun sira ne’ebé seidauk asesu ba eletrisidade, husi esforsu ne’e mak hato’o ba Xefe Estadu.
“Progresu ne’ebé ita halo maka eletrisidade elétrika, ne’e ita halo programa eletrisidade nasionál liuliu ba suku sira ne’ebé seidauk asesu enerjia elétrika,” nia hateten.
Entaun EDTL halo programa ida ne’e fahe ba faze tolu, primeiru faze 44 projetu kobre 24 suku, depois segundu faze 34 projetu kobre 17 suku, no ida seluk maka 36 projetu kobre 23 suku.
“Ita implementa la’o hela, primeiru faze la’o iha suku 6 maka konklui porsentu 100 ona no balu la’o hela, nune’e espera iha fulan ida ou balu bele konklui tan. Segundu faze mós tama ona implementasaun, kompañia hahú konstrusaun iha terenu no terseiru faze mak agora tama ona faze finalizasaun avaliasaun tekníku ho finansia, depois ita asina kontratu ho kompañia sira para implementa,” nia afirma.
Husi ne’e, hela de’it suku tolu mak seidauk lansa tender, maibé iha semana oin lansa ona, ida iha suku Fatu-kalu Same, ida seluk iha Fatu-Makerek Manatutu no Fatu-Mea Suai.
“Ho nune’e iha tinan ida ne’e ita atu promove suku hotu-hotu, la’ós asesu kedas mais promove hotu iha prosesu eletrifikasaun. Entaun ita-nia inisiativa iha fim de ano, maioria husi projetu sira ne’e konklui, ho ida ne’e ita-nia populasaun sira bele asesu ahi,” nia relata.
Nia subliña, agora ba aldeia sira ne’ebé seidauk iha saida mak EDTL halo, ne’e hamosu hela polítika eletrifikasaun komunitáriu ne’e sei serbisu komunitariu entre EDTL ho komunidade, atu nune’e serbisu hamutuk hodi aselera serbisu eletrifikasaun ne’e, para nune’e populasaun labele hein kleur tan, tanba sira hein ona iha tinan 20 liu ona.
“Progresu seluk maka ita halo instalasaun kontadores ba populasaun sira, hanesan iha tinan kotuk ita sosa 108 mill kontadores prepagu ne’ebé ita instala hahú kedas iha fulan Outubru mai to’o fulan kotuk, ita instala ona 76 mill kontadores Timor laran tomak,” nia hatete.
Husi ne’e mós inisiativa sira kona-ba planu enerjia alternativu atu halo ho estudu sira ne’ebé iha, hodi depois haree oinsá hatún presu produsaun enerjia ne’e rasik, entaun pontu sira mak ohin relata ba Xefe Estadu.
“Em prinsípiu Prezidente kontente ho serbisu ne’ebé iha dezafiu barak no obstákulu barak, mais nia kontente ho progresu sira ne’ebé iha, nune’e nia husu kontinua mellora di’ak liu tan serbisu iha kualidade fornesimentu no mós haree oinsá atu hatún presu eletrisidade ne’e rasik. Entaun EDTL sei haree no halo ezersisiu para refleta rekomendasaun sira ne’ebé Prezidente ohin hato’o,” nia dehan.
Antes nia hakotu nia afirma, hanoin sira ne’e maka partilla ona ba Xefe Estadu atu nia apar saida maka EDTL halo ona no saida mak EDTL sei halo ba oin, nune’e bele garantia kontinua fornese enerjia elétrika ho seguru ba públiku.
2,079 total views, 6 views today
Bele hare Video Seluk :
Subscribe to Timorpost
