DILI (timorpost.com) — Joven ida ho kondisaun defisiente fíziku deside fan sigaru hodi kontinua nia estudu iha Universidade, tanba lakoi tane liman ba ema seluk.
Joven universitáriu ne’e ho naran kompletu Ando Colo, oan daruak husi Jacinto Elu no Sabina Pate, oan primeiru nia bin ho nia alin feto na’in-2 hamutuk na’in-4. Família simples ne’e iha rai ketan Rejiaun Administrativu Espesiál Oe-kusse Ambenu (RAEOA), Sub-rejiaun Pante Makasar, Suku Taiboko, Aldea Bimano.
Tuir observasaun Timor Post Online ba joven Ando Colo ne’e, defisiensia fíziku kona de’it iha ninia isin parte loos nian, liman loos ho ain loos mak hetan problema.
“Defisiensia fíziku ne’e fou-foun ha’u normál hela, maibé iha tempu ne’ebá ha’u moras hela sei tinan 5, iha ne’ebá ha’u atu tama ba 1° Ano (kelas satu SD), husi ne’e ha’u la konsege remata 1° Ano, iha Eskola Filiál Bimano, moras tiha ona, entaun ha’u para tiha eskola, husi ne’e ha’u deskansa tinan tolu (3) mak tama fali eskola,” Ando dehan ba Timor Post Online iha Jardín Motaél, Domingu (25/09).
Husi ne’e, Ando foin tama fali eskola, nia inan ne’ebé hahoris sira na’in-4 fila ona ba mundu seluk (mate), Ando la foti desizaun atu hapara tan ninia estudu, nia husu lisensa semana ida, tanba nia inan mate, hela de’it ho nia pai.
“Ha’u to’o SMP kelas 2, ha’u-nia Apa tuir tan ha’u nia Ama. Iha momentu ne’ebá ha’u pasiensia de’it, tanba ita-nia is ou ita-nia destinu iha Na’i Maromak nia liman,” Ando konta.
Hafoin remata Ensinu Báziku iha Oelkaem, Ando kontinua Sekundariu iha Eskola Tekníku Vokasionál (ETV) Palaban iha Oe-Kuse Villa. Husi ne’e Ando Maromak akompaña nia naran sai iha Universidade Nasionál Timor Lorosa’e (UNTL).
“Ha’u rona naran sai iha UNTL, ha’u agradese ba Na’i Maromak ne’ebé akompaña tebes hodi hetán oportunidade ida ne’e. Ho ida ne’e ha’u hetán bolsa estudu husi FDCH, nune’e maski kada semesster ita-nia Governu apoiu, maibé ha’u buka meus atu fan sigaru ba osan bemo no bainhira ha’u presiza iha tempu ruma. Tanba Apa ho Ama laiha ona, atu depende ba ha’u-nia bin sira mais sira moris de’it nu’udar agrikultór nia oan,” Ando afirma.
Nia hatutan, sigaru loron kalan iha pasta laran de’it, dadersan atu ba eskola lori, sai husi eskola mak tuir Jardín 5 de Maiu, Palásiu Governu nia oin, Largo Lecidere depois han iha fatin hirak ne’e to’o loron matan atu lakon ona mak foin fila uma.
“Ha’u deside faan sigaru ho osan dólar amerikanu 50 USD, ho ida ne’e nia sosa sigaru oin tolu, sigaru sira ne’e hanesan L.A slop ida dólar amerikanu ($.15 USD), Suria $.18 USD no Malboro dólar amerikanu 18.50 sentavus. Husi ne’e loron ida hetan osan funan 10 dólar husi sigaru oin tolu ne’e,” Ando haktuir.
Hosi esforsu ne’e Ando Colo agora hala’o ninia estudu iha UNTL, Fakuldade Ekonomia Jestaun, Departamentu Turizmu, foin semesster 2, hela ho primu iha koos Ai-tarak Laran.
Ando dehan, mai iha Dili ho ninia Moto ida katak, “Husi foho mai Vila tan de’it futuru, husi Villa ba foho tanba rai moris fatin”.
Tanba ne’e nia husu ba maluk defisiensia sira iha rai doben Timor-Leste, nafatin hakat ba oin ho oportunidade ne’ebé hetán, atu nune’e iha futuru bele kontribui ba rai ne’e.
3,481 total views, 3 views today
Bele hare Video Seluk :
Subscribe to Timorpost
