DILI (timorpost.com) – Konsellu Ministru (KM), aprova projetu proposta lei ba Orsamentu Jerál Estadu (OJE) 2023, ho montante $3.000.000.000.000 resin.
“Konsellu Ministru mós ohin aprova projetu proposta lei ba Orsamentu Jerál Estadu 2023, maibé nia detallu ne’e sei hato’o ba ita boot sira kona-ba nia montante,” dehan Ministru Prezidensiál Konsellu Ministru, Fidelis Magalhães, iha Palásiu Governu, Kuarta (14/09).
Nia subliña, tanba iha orsamentu ne’e RAEOA rejistu nafatin ho fundu veteranu nian, ne’ebé sei kontinua nafatin ho métodu ne’ebé hatene ona.
“Tanba sempre inskreve iha OJE ne’e kona-ba seguransa sosiál, eskrave mós fundu veteranu sira-nia, entaun ho hirak ne’e mak ita haree nia totál ne’e $3 Bilhões, maibé ninia totál loloos ne’e hanesan iha tinan kotuk ne’e,” deklara nia.
Nia subliña, ne’ebé OJE 2023 ho totál biliaun $3 ne’e tanba konta ho fundus sira ne’e hotu, ne’ebé antes ne’e tau tiha ona hanesan fundu ba Veteranu sira.
“Maibé ohin aprovasaun ne’e mós ho alterasaun hotu, maski la barak maibé alterasaun ki’ik, depois parte tékniku sira sei halo ajustamentu sira depois haruka ba iha Parlamentu Nasionál,” deklara nia.
Ministru ne’e dehan tan, maibé karik la hamutuk ho fundu veteranu ho Seguransa Sosiál nian, montante la to’o ne’ebá, maibé detallu bele konfirma fali Ministru Finansas, hodi bele halo esplikasaun klaru.
Enkuantu Projetu Proposta Lei ba Orsamentu Jerál Estadu (OJE), 2023 ne’e aprezenta husi Ministru Finansas, Rui Augusto Gomes, hafoin membru Konsellu Ministru sira diskute tetu hodi deside halo aprovasaun.
2,184 total views, 3 views today
Bele hare Video Seluk :
Subscribe to Timorpost
