DILI (timorpost.com) – Prezidente Autoridade Rejiaun Administrativa Espesiál Oekusi Ambeno (RAEOA), Arsénio Bano, dehan semana oin nia sei ba Portugál hodi haree progresu Ró Haksolok.
“Ha’u informa ba Primeiru Ministru, semana oin ha’u sei ba Portugál ba atu check informasaun no haree took progresu Ró Haksolok nian ne’e oinsá ona,” nia hateten iha Faról, Segunda (12/09).
Nia dehan, nia parte ba hodi haree no halo relatóriu kompletu kona-ba Ró Haksolok, hodi hato’o fali ba Primeiru Ministru, Taur Matan Ruak.
“Semana oin ha’u ba mak ita haree took Ró ne’e nia progresu to’o ona iha ne’ebé, tanba ha’u hakarak buat sira ne’e la’o tuir nia dalan, ita ba sira dehan ita haruka ona tripolante sira atu lori Ró Haksolok ne’e ka seidauk,” hateten nia.
Ho ida ne’e nia parte dehan, sei hahú halo preparasaun ba ema sira atu servisu iha Ró Haksolok ne’e, tanba ne’e nia parte sei ba direita Portugál hodi haree.
“Ha’u fiar Ró ne’e sei mai, tanba ne’e sasán Timor-Leste nian, ha’u ba semana ida iha Portugál, no sei ba ho ekipa tékniku sira balun, no ha’u fila mak ita ko’alia no haree,” hateten nia.
Bano reforsa tan, tuir planu nia ho ekipa tékniku sira atu ba Portugál ne’e iha loron 16 ka 17 fulan Setembru ne’e, no durante semana ida iha Portugál.
“Orsamentu millaun 14 USD ne’ebé foin daudaun aprova tan ba Ró Haksolok ne’e ita komesa gasta daudaun ona, maibé ita selu tuir progresu ne’ebé iha, ita la naran gasta tanba ha’u mós hakarak moos,” deklara Bano.
Maibé gasta hira ona ne’e nia parte la lembra presiza haree fali relatóriu lai, maibé osan millaun 14 USD ne’e seidauk gasta to’o millaun 4 ka 5 USD.
4,534 total views, 3 views today
Bele hare Video Seluk :
Subscribe to Timorpost
