Dili (Timor Post) – Atoni-oan sira preokupa ho kondisaun Ró Berlin Ramelau nian, tanba la kleur at hela de’it impede movimentasaun Dili-Oekusi no prezudika tebes sira atividade.
Atoni-Oan Manuel Sa’apan Quefi, hatete iha informasaun katak Ró Berlin Ramelau labele halo viajen tanba kondisaun odamatan ró nian mak ladi’ak.
“Ro Berlin Ramelau laiha Viajen, ha’u Pesoalmente sente triste tebes tanba bele prezudika ba movimentasaun povu Oe-Kusi no bele afeta ba nesesidade ne’ebé importante no liuliu ba maluk sira ne’ebé hala’o negósiu”, nia hateten ba online Timor Post iha Jardín 05 de Maiu, Segunda (15/08).
Nia dehan, liga ba situasaun ida ne’e sai pergunta tebes ba Atoni-Oan, tanba saida maka Ró Berlin Ramelau, sempre falla hela de’it, maibé ukun na’in-sira liuliu parte relevante laiha seriedade ba problema refere. Portantu asosiasaun Mariner mós agora sira nunka rona ka haree nia observasaun durante ne’e.
“Tanba ne’e ha’u pesoalmente nota katak erru ida ne’e la’ós problema kondisaun Ró, maibé ne’e iha irregularidade ba sistema, tanba ita haree kondisaun Ro ne’e foun hela, nia halo operasaun seidauk to’o tinan nusa mak nia at hela de’it”, nia lamenta.
Tanba ne’e nia sujere ba Ukun-na’in sira primeiru atu trata povu Oe-Kusi tuir prinsípiu ne’ebé Konstituisaun hatuur iha artigu 4 iha alínea 3, tanba durante ne’e naran de’it mak espesiál, maibé povu Oe-Kusi nunka sente espesiál.
Nune’e nia mós sujere ba parte relevante liuliu ba Ministru Transporte no Telekomunikasaun, Agustinho da Silva, labele tuur de’it iha AC laran, se bele sai mai netik iha Portu hodi observa direta ba povu nia moris, kada tinan uza povu nia naran hodi halo proposta maibé povu la sente nia benefísiu.
Alende ne’e ikus liu atu sujere mós ba Na’i-Ulun sira atu hare mós presu billete Barco Rapidu, tanba iha tinan kotuk Presu billete ekonomia 10 USD, VIP 15 USD, maibé agora Ekonomia sa’e 20USD, VIP sa’e ba 25 USD, tanba nia presu la konsistente, tanba ne’e sira duvida tanba sá mak presu la konsistente.
“Tuir ami-nia notasaun katak mina folin sa’e, maibé tuir deklarasaun Diretór DNTT deklara kada transporte públiku folin mina bele sa’e, maibé tarefa ba pasajeiru sira la’o normal, maibé situasaun ida ne’e viral de’it asaun laiha”, nia hakotu.
1,952 total views, 3 views today
Bele hare Video Seluk :
Subscribe to Timorpost
