DILI (Timor Post) –Primeiru Ministru (PM), Taur Matan Ruak, Kinta (11/08), halo enkontru semanál ho Prezidente Repúblika (PR), José Manuel Ramos Horta, kona-ba atividade Governu nian iha rai laran.
Tuir Primeiru Ministru (PM), Taur Matan Ruak, hatete atividade Governu nian esforsu rua, daudaun ne’e diversifika ekonomia hodi la depende ba fundu mina rai.
“Ita iha esforsu rua ne’ebé ita halo daudaun atu diversifika ekonomia hodi la depende ba fundu mina rai. Ida mak ita buka alternativu seluk ne’ebé ho sériu mak, Greater Sunrise no daudaun iha Suai halo ona perfurasaun ba mina matan tolu,” nia dehan hafoin remata enkontru ho Prezidente Repúblika, iha Palásiu Prezidensiál, Bairru-Pité.
Nia dehan, maski Timor-Leste deside taka hikas, tanba la hatudu sinais di’ak, maibé posu rua seluk hanesan posu potensiais.
Alende ida ne’e, haree empreza esploradór halo hela preparasaun másimu, hodi halo perfurasaun ba mina matan iha Same.
“Governu mós hanoin ona, hodi halo esplorasaun ba bloku seluk ne’ebé identifika iha area petrolíferu nian, Timor Gap mós iha nia eskluzivu, ida mak Pualaka no parte mina rai nian, Governu Timor-Leste kria tiha ona empreza mineral ne’ebé provavelmente ba oin sira-nia atividade sei komesa,” nia afirma.
Nia relata, iha tinan ida ne’e, Governu Timor-Leste mós hahú halo investimentu sériu iha setór produtivu sira, liuliu iha setór primária, hanesan agrikultura, hanesan kafé ne’ebé oras ne’e Governu hahú tau matan ho apoiu husi Prezidente Repúblika.
“Timor-Leste halo ona lansamentu inisiál ba reabilitasaun Kafé ne’ebé ho prezensa Xefe Estadu nian iha Munisípiu Ermera, Postu Rai-laku, no semana ne’e nia laran reuniaun ona ho Ministériu relevante sira, liuliu Ministériu Agrikultura no Peska (MAP), hamutuk ho Vise Ministru MAP, Diretór Jerál sira ho ekipa tékniku hotu no reprezentante husi Palásiu Prezidensiál, atu haree opiniaun husi empreza no Asosiasaun, no kooperativa agrikultór sira, hodi rona sira-nia opiniaun direita,” nia afirma.
Nune’e mós, Governu halo hela ánaliza ba dokumentasaun sira ne’ebé iha, no tuir mai iha parte téknika Governu sei haree saida mak tenke halo, liuliu iha Governu nia parte ba reabilitasaun Kafé.
“Governu tau osan boot kuaze 6,7 millaun, no estimasaun katak, osan ida ne’e sei bele kobre atu halo reabilitasaun ba 10 mill hektares kafé iha territóriu nasionál,” nia dehan.
Husi ne’e mós iha problema sira ne’ebé komunidade sira koloka, mak ida se Governu ou Estadu halo reabilitasaun ba 10 mill hektares agora ne’e, signifika redus produsaun agora no segundu kapasidade ba reabilitasaun 10 mill hektares ne’e.
Nia haktuir, Timor-Leste laiha no MAP másimu bele halo de’it ba reabilitasaun ba 500 ka 1000 hektares tinan ida no 10 mill hektares liu ba tinan ida de’it ne’e imposivel.
Tanba ne’e, Governu hanoin katak, tenke halo ezersisiu ida halo nusa, para progressivamente atu bele responde ba preokupasaun sira ne’e.
“Problema sira seluk hanesan estrada no mudansa klimátika bele influénsia mós produsaun kafé. Governu tenke aumenta mós protividade tanba Timor-Leste ninia protividade ki’ik no kuaze depende ba rai li’ur no impaktu sasán karun,” nia hakotu.
2,045 total views, 3 views today
Bele hare Video Seluk :
Subscribe to Timorpost
