DILI (Timor Post)—Xefe Departamentu Jestaun, Jaime Coa, hatete preokupasaun hosi komunidade Rejiaun Administrativa Espesiál Oe-kuse Ambenu (RAEOA), kona-ba sirkulasaun Ró Berlin Ramelau paradu, daudauk ne’e parte kompetente halo ona konfirmasaun ba manutensaun Ró katak atividade ba RAEOA oan aban bele halo ona viajen.
“Komunidade Atoni-oan la halo viajen iha loron (20/07) tinan 2022, tanba kondisaun Ró ladún estavel, ho razaun laiha mina, maibé rezultadu ohin hasai ona ba públiku liuliu Atoni-oan sira katak aban bele halo ona viajen”, hateten iha Rezidénsia Faról, Kuarta (20/07).
Nia dehan, informasaun ne’ebé sira fó sai ba pasajeiru hot-hotu liuliu RAEOA oan sira katak, oráriu ba viajen loron Segunda-feira 17 fulan Jullu 2022, Ró refere labele halo operasaun no sei adianta ba iha loron Kinta-feira.
“Ita adianta oráriu ne’e ba iha loron Kinta-feira, tanba kondisaun Ró sei iha hela prosesu manutensaun, tanba ne’e mak muda loron ba Kinta-feira, nune’e fiar katak aban loron 21 fulan Jullu 2022 komunidade no pasajeiru sira bele halao ona viajen”, nia subliña
Nia dehan, prosesu ba fa’an ticket iha loron Kinta-feira loron 21 fulan Jullu 2021 mak iha oras servisu nian, (07.30-12.00) to’o (14.00-17.000).
Alende ne’e nu’udar komunidade husi RAEOA, Abílio Soares, hatete iha loron 19 fulan Jullu 2022, Ró Berlin-Ramelau, atu halao viajen, maibé realidade sira mai hein barak, rezultadu mosu dehan Ró mina laiha, no kondisaun Ró nia odamatan a’at.
“Nu’udar Atoni oan agradese ba Governu no mós traballadór iha Aportil, bele koopera malu ho di’ak, ohin bele hasai rezultadu katak, aban loron Kinta fulan Jullu 2022, Ró refere bele halo viajen”, nia hateten.
Nia dehan, sira garante katak rezultadu ne’ebé fó ona ba públiku katak Ró Berlin-Ramelau sei halai iha aban, maibé aban mak la halai, sira la’ós halo presaun maibé ho motivasaun sinseru ida ba Governu atu rezolve problema ne’e ho di’ak.
Nia agradese ba desizaun pozitiva ida ne’e, tanba fó rezultadu ida ne’ebé apar ho ezijénsia ba pasajeiru tomak nia intensivamente hot-hotu, tanba ne’e orgullu ba servisu no esforsu tomak hodi halo manutensaun lalais ba Ró Berlin-Ramelau bele halai.
424 total views, 3 views today
