DILI (Timor Post)—Embaixadóra Timor-Leste (TL), ba Australia, Ines Maria de Almeida, aprezenta kompañia “Thomas Food International” husi Australia ba Sekretáriu Estadu Profisionál no Empregu (SEFOPE), ho objetivu atu halo akordu ida ho Governu Timor-Leste liuhusi loke empregu ba Timoroan sira hodi ba servisu.
“Kompañia Thomas Food Internasionál, hanesan kompañia boot ida ne’ebé eziste iha Australia, nia area servisu mak haree liu ba prosesu naan nian, hanesan naan karau, naan bibi, husi ne’e Governu bele halo akordu ho kompañia ne’e atu bele haruka ita-nia maluk sira ba servisu iha ne’ebá”, nia hateten iha Edifísiu SEFOPE, Kaikoli, Tersa (19/07).
Tuir embaixadora ne’e, hatete husi oportunidade ida ne’e la’ós ba ko’a naan de’it, maibé mós fó treinamentu ba sira, hanesan mekániku, eletrisidade, IT, hanesa komputadór, entaun husi kompañia ida ne’e bele loke oportunidade di’ak ba nasaun Timor-Leste.
“Kompañia ne’e mós iha planu atu loke fabrika ida iha Timor-Leste, hodi halo investimentu tanba parseria ho Governu, atu fó treinamentu ba Timoroan sira, ko’a naan karau, bibi no mós hanesan treinamentu, mekániku, no eletrisidade, molok hakat ba servisu iha Australia”, nia informa.
Nia dehan, kompañia Thomas Food Internasionál laiha kuota ba nasaun Timor-Leste, iha mak Governu ho Governu, husi kompañia sira ne’e atravesa husi Governu Australia, hato’o ema na’in hira mak sira sei rekruta ba servisu iha Australia, nune’e laiha kuota.
“Ita orgullu boot tanba kompañia bo’ot ida husi Australia bele fó oportunidade ba ita Timoroan sira atu ba servisu iha Australia, nune’e agradese tebes ba esforsu SEFOPE nian, ne’ebe ohin halo akordu”, nia hateten.
Alende ne’e reprezentante kompañia, nu’udar Kooperativa Management, Shane WiTTnaNN hatete, sira seidauk iha planu bainhira mak halo rekrutamentu ba traballadór Timoroan sira, tanba sira sei deside, no sei haree kondisaun nasaun nian depois foti desizaun hodi halo rekrutamentu.
“Ami kontente tebes mai eventu ida ne’e hodi bele hasoru malu ho ajénsia Governu nian, liuliu SEFOPE, kona-ba futuru kolaborasaun servisu iha Australia nian”, nia hateten.
Iha parte seluk Sekretáriu Estadu Formasaun Profisionál no Empregu (SEFOPE), Alarico do Rosario, fó agradesimentu ba servisu no forsa tomak ne’ebé embaixadóra Timor-Leste, Ines Maria de Almeida, ne’ebé sempre servisu makas hodi loke oportunidade di’ak mai iha nasaun Timor-Leste (TL).
“Husi sira-nia esforsu tomak bele hetan kompañia Thomas Food Internasionál, ne’ebé bo’ot no ema rihun ba rihun mak servisu iha ne’ebá”, nia hateten.
Nia hatutan, oportunidade hanesan kompañia na’in sira mai aprezenta ne’e atu haree Timoroan sira-nia kondisaun ba servisu iha ne’ebá bele ka lae, tanba iha kompañia laran iha minute ida oho karau, bibi, hamutuk sanulu-resin-lima,
“Ha’u fó hatene ba kompañia Thomas Food Internasionál, sira ne’ebé mai hasoru, katak Timoroan seidauk iha kapasidade kona-ba maneira atu ko’a na’an, maibé sira dehan ami la presiza skill, maibé ami lori sira ba servisu, ho mós faze aprendizajen iha ne’ebá”, nia dehan.
Tan ne’e, nia dehan oportunidade ida ne’ebé di’ak tebes ba Timoroan atu servisu iha Australia, ho razaun ba atu aprende buat barak atu mai kontribui fali ba iha Timor-Leste.
304 total views, 3 views today
