DILI (Timor Post)— Konfederasaun Sindikatu Timor Leste (KSTL), mós saudai ne’e komenta kuandu laiha solusaun ba saláriu mínimu, sira sei mobiliza traballadór halo demonstrasaun, maibé Governu Daualuk promete sei rezolve molok mandatu remata.
“Ita iha ona ajenda, ita servisu tuir ajenda, ita tau ona montante iha ne’ebá konserteza bele ezekuta, tanba iha ne’ebá mós Governu tau nia prioridade ba mandatu, ne’ebé ha’u fiar ita sei halo,” hateten Ministru Koordenadór Asuntu Ekonómiku (MKAE), Joaquim Amaral, ba Timor Post hafoin remata reuniaun Konsellu Ministru Estra-Ordináriu iha Palásiu Governu, Segunda (18/07).
Nia hatutan, kona-ba aumenta saláriu mínimu ne’e iha planu Oitavu Governu Konstitusionál, iha tinan ne’e ho montante 135.00 USD. Katak husi 115.00 USD aumenta ba 135 USD, ne’ebé kestaun tempu hodi halo aprovasaun.
Tanba ne’e, produs lei hodi halo diskusaun, karik sei iha aumenta ka mantein, maibé ida ne’e hein de’it atu realiza. Tanba ninia montante mós klaru kedas, nune’e sei laiha tan diskusaun.
“Daudaun ne’e iha ona planu lejizlasaun, ne’ebé ita halo prioridade tuir ida ne’e, no ha’u fiar iha mandatu ne’e nia laran ita sei realiza ida ne’e,” hateten Ministru Koordenadór ne’e.
Ministru ne’e, dehan antes ne’e hala’o ona enkontru dala rua ka tolu ho setór privadu liuliu empreza sira kona ba saláriu mínimu ne’e. No liu husi tri-partida entre governu, setór privadu no KSTL rasik.
Entretantu, Oitavu Governu nia mandatu hela tinan ne’e, signifika iha tinan ne’e nia laran sei aprova saláriu mínimu ba traballadór hotu-hotu.
1,474 total views, 3 views today
Bele hare Video Seluk :