DILI (Timor Post)—Banku Nasionál Komérsiu Timor-Leste (BNCTL), foin lalais ne’e lansa tan produtu foun ho naran Depózitu Pensionista.
“Produtu ida ne’e, ami fasilita ba komunidade hotu ne’ebé mak nia idade ne’e alkansa ona, mínimu ne’e 25 ba leten, nia bele loke konta ona, hodi nune’e nia mós bele rai ona osan,” Xefe Divizaun Operasaun BNCTL, Manuel Rangel da Cruz, ba Timor Post, iha knar fatin Mandarin, Tersa (12/10).
Objetu husi lansa depózitu pensionista ne’e, nia dehan, atu garantia sustentabilidade ba kontinua moris ba reforma nian. Rai osan durante ativu iha servisu depois de reforma too ida 78 ba oan no bei-oan sira.
Montante depozita ne’e, nia afirma, depende ba kliente sira. Aplika funan 1.5% vale ba balansu depózitu $50.00, no levantamentu konforme ba termu akordu entre kliente no BNCL.
Enkuantu, kona ba rekizitu asesu ba konta depózitu pensionista, nia dehan, hanesan foto kopia billete identidade/kartaun eleitorál/pasaporte mínimu tahan rua, foto koloridu 3×4 tahan ida ka bele hasai direta iha BNCTL.
“Depózitu inisiá $10.00, karik kliente hakarak uza kaderneta $2.00. Termu ba kondisaun depózitu nu’udar konta poupansa individual ba Timoroan hotu ne’ebé ativu ka reforma ona iha idade 55,” nia esplika.
Depózitu pensionista ne’e ho moeda depende ba kliente no fleksibilidade ba levantamentu. No daudaun ne’e iha ona kliente na’in haat mak aplika ba produtu foun ne’e.
“Iha mós kréditu ba pensionista sira ho montante másimu $20.000.00, iha períodu kréditu másimu tinan lima. Kréditu ne’e husi idade 55 ba leten ka konsidera hanesan idade reformadu,” nia katak.
Iha porsaun kréditu pensionista másimu 50% husi pensaun mensal ho kustu prosesu kréditu 1% husi montante emprestimu. Jurus kréditu 8% no kustu administrasaun 1%.
Rekizitu ba kréditu pensionista hanesan, foto kopi kartaun eleitorál proponente, kartaun BI, pasaporte, foto koloridu (3×4) tahan ida no bele hasai iha BNCTL, ativu seluk hanesan imovel ka movel (Rai, uma ka karreta) ne’ebé dokumentu komprovativu sei válidu.
No sei laiha mandatoriu prokura seguru kréditu, pensaun velise tenke transfere ba konta bankária pensionista iha BNCTL.(jho)
891 total views, 3 views today
Bele hare Video Seluk :
Subscribe to Timorpost
