Timor Post (06/10/2020)—Parlamentu Nasionál (PN) aprova ona proposta aliterasaun númeru 23, kona-ba verba adisiona konsesaun eskolár ba eskola Ensinu Báziku, Sekundáriu no Téknika Vokasionál iha Timor-Leste.
Rezultadu votasaun ba proposta aliterasaun númeru refere, a-favor 43, kontra zero (0) no abstensaun 21.
Proposta aliterasaun númeru 23 ne’e, deputadu proponente atuál Prezidente Komisaun G, Antonio Verdial husu atu retira montante $1, 514 millaun hosi kategoria despeza rezerva kontinjénsia dotasaun todo governu, koloka fali iha dotasaun orsamentál Diresaun Nasionál Finansas Administrasaun no Lojístika Ministériu Edukasaun Juventude no Desportu. No verba adisionál ida ne’e, destina ba iha konsesaun eskolár ba Eskola Ensinu Báziku, Sekundáriu no Tékniku Vokasionál iha Timor-Leste.
Verdial esplika osan konsesaun eskolár ne’ebé mak durante ne’e MEJD aloka ba estudante ensinu báziku sira, kada alunu ida $1 dolar, ensinu sekundáriu $0, 50 sentavu, ensinu tékniku vokasionál kada alunu ida $1 dolar.
Nia hatutan utilizasaun ba konsesaun eskolár ne’e iha buat haat, ida, uza osan ne’e hodi hadi’a odamatan, janela, fexadura, armáriu no buat sira seluk iha eskola, rua, kobre kustu dezlokasaun ba diretór eskoláres no profesór sira ne’ebé dala ruma mai tuir reuniaun iha a-nivel nasionál no Tolu, uza ba produs matéria ezame trimestrál no Haat, fotokopia matéria ezame.
Realidade hatudu mai ita hotu katak, Antonio hatete, governu uza hela dotasaun orsamentu temporariu, mai hosi orsamentu jerál Estadu tinan 2019, ho osan DOT, labele kobre to’o fulan 10 resin ida, ho razaun ida ne’e mak nu’udar deputadu proponente pretende hasai osan ho montante 1. 514 millaun, hosi kategoria despeza rezerva kontinjénsia hosi dotasaun governu tomak, hodi aloka ba iha dotasaun orsamentál diresaun nasionál finansas no administrasaun lojístika Ministériu Edukasaun Juventude Desportu, verba adisional ida ne’e destina direta ba konsesaun eskoláres
“Proposta númeru 23 pasa”, Prezidente Parlamentu Nasionál, Aniceto Guterres, anunsia iha votasaun, tersa (06/10).
Xefe Bankada Frente-Mudansa (FM), Deputada Isabel Ximenes, hatete, edukasaun sai hanesan fatór ida ne’ebé mak prioridade, tanba ne’e governu presiza tau atensaun ho sériu.
“Edukasaun ne’e sai prioridade konsesaun eskolár só to’ode’it iha Juñu, estudante sira presiza osan para hetan konsesaun eskolár ate Novembru. Ida ne’e problema ne’ebé labele adia”. Isabel hatete
Iha fatin hanesan, Ministru Edukasaun Juventude no Desportu, Armindo Maia, hatete, konsesaun eskolár la sufisiente atu kobre to fulan Novembru.
“Tuir pakote orsamentál ne’ebé mak ami simu, kona-ba konsesaun eskolár, la sufisiente atu kobre to’o fulan Novembru, orsamentu ne’ebé mak iha ami nia pakote so bele kobre hosi fulan Janeiru to Juñu. Enkuantu fulan Jullu ba Novembru, depois ami halo konta, la konsege bele kobre to iha ne’ebá, orsamentu ida ne’e ba 281. 31 estudantes hosi ensinu báziku to ensinu sekundáriu jerál no tékniku vokasionál, durante fulan lima ba adisional ne’ebé mak ami husu”. Armindo deklara. (Jornalista: Julio Salinas Soares)
909 total views, 3 views today
Bele hare Video Seluk :