DILI (timorpost.com) – Públiku kestiona kona-ba bolsa méritu, Governu liuhosi Ministériu Edukasaun, Juventude no Desportu (MEJD), haruka ona osan ho montante 7,5 USD resin ba Banku Nasionál Komérsiu Timor-Leste (BNCTL), hodi halo pagamentu ba estudante melor klasifikadu sira iha territóriu Nasionál.
MEJD halo identifikasaun ona ba estudante melor klasifikadu sira iha territóriu nasionál no iha tempu badak BNCTL halo transferénsia ba konta bankária estudante ida-idak nian.
Prosesu ne’e la fasil, tanba ne’e hahú husi Ministériu Edukasaun Munisipál sira, depois hato’o mai iha Ministériu Edukasaun, Juventude no Desportu (MEJD), ligasaun ho BNCTL ne’e hanesan banku ida determina ona, no BNCTL mak diretamente transfere osan ba konta bankária benefisiáriu sira.
“MEJD asina ona akordu ho BNCTL, oras ne’e rejistu ona 12.928 estudante ne’ebé sai benefisiáriu ba bolsa méritu ho orsamentu 7,537,500.00 USD”, dehan Diretór Jerál do Ensinu, MEJD, Luis Manuel da Costa Fernandes, iha knaar fatin, Vila-verde, Tersa (31/01).
Nia afirma, MEJD simu lista haree husi rezultadu Ezame Nasionál, haree husi prosesu eskola sira hetan aprovasaun husi edukasaun munisipál sira, refere liubá pasajen terseiru siklu klase kuartu ano, segundu siklu sestu ano, désimu primeiru ano ba segundu ano husi ensinu sekundária jerál no ensinu tékniku vokasionál.
Tanba ne’e, nia dehan, estudante ne’ebé hetan melor klasifikadu ba bolsa méritu, hahú primeiru klasifikasaun to’o kintu klasifikasaun, ne’e desizaun husi eskola sira iha territóriu nasionál.
“Desizaun ne’e foti husi ema ne’ebé hanorin iha eskola refere, lista iha ema na’in-5 to’o 10 husi ensinu báziku, pasajen na’in-5 refere ba primeiru ano ba segundu ano, ensinu sekundáriu no tékniku vokasionál no mós lista sira taka iha eskola sira”, nia hateten.
Nia hatutan, karik iha buat balun laloos, koordenadór eskola hamutuk ho inspetór eskola sira bele rezolve no aprezenta ba ministériu munisipál sira halo verifikasaun hetan aprovasaun husi autoridade sira depois submete mai ministériu edukasaun, juventude no desportu (MEJD) liuhosi diresaun jerál nasionál do ensinu, nune’e aprova osan tuir ema ne’ebé hetan melor klasifikadu.
1,477 total views, 12 views today
