Dili (timorpost.com) – Universidade Oriental Timor Lorosa’e (UNTAL) hamutuk ho Ministra Saúde, Odete Maria Freitas Belo no Universidade Citra Bangsa Kupang Indonesia halo abertura formasaun ba Estudante foun etapa dahuluk nian hamutuk 1200 iha tinan 2023.
“Atividade ohin ne’e fó palestra ba estudante foun sira tanba ita servisu hamutuk ho Universidade Citra Bangsa iha Kupang, ne’ebé iha relasaun ho saúde nian, entaun ami mós konvida Ministra Saúde hodi hato’o liafuan ida ka rua ba estudante foun sira, hodi bele halo di’ak ba eskola ida ne’e”, Reitór UNITAL, Florindo Perreira, dehan iha Salaun Auditorium UNITAL, Bekora, Tersa (24/01).
Nia hatutan, nune’e mós konvida Institutu Citra Bangsa Kupang Indonesia nian mai iha ne’e atu oinsá sira mós akapta programa iha ne’e, ho sira-nia area saúde para estudante sira pratika karik ho fasilidade kompletu.
Tan ne’e nia dehan, kooperasaun entre Universidade sira asina akordu ona depois agora tenke ser fakuldade entre fakuldade, maibé sira mai espesialmente hodi observa liu ba fakuldade saúde nian, depois mak ba iha fakuldade sira seluk, servisu hamutuk atu hasae kapasidade dosente atu nune’e mós sira bele mai hanorin iha UNTAL no mós bele ba hanorin iha ne’ebá.
“Ita koopera ho Universidade la’ós ho Universidade Citra Bangsa de’it, maibé ho Universidade sira seluk ne’ebé uluk mós mai tiha ona no balun atu mai tan, ita mós atu halo planu hodi haruka ita-nia estudante balun no Dosente sira hodi ba kontinua estudu Mestradu no Doutoramentu iha Universidade ne’ebé ita asina akordu ona”, nia dehan.
Enkuantu ohin mós Ministra Saúde, ko’alia kona-ba sira-nia ambiente iha ne’ebá no oinsá estudante sira hala’o estudu ho didi’ak to’o hotu, tantu estudante ho dosente sira hotu atu nune’e bele fó ambiente di’ak nian hodi bele suporta estudante sira to’o remata estudu.
“Ita sei servisu hamutuk ho Ministériu Saúde, hodi nune’e bele mós iha akonsellamentu kona-ba oinsá suporta ba eskola ne’e, depois ida ne’e ita halo oinsá iha futuru bele di’ak ba nasaun no di’ak ba ema hotu”, Reitór ne’e akresenta.
Portantu total estudante foun iha ne’ebá etapa dahuluk na’in-1200 ne’ebé sira simu ona, no sei iha etapa tuir mai segundu no terseiru, nune’e mós iha Eskola ne’ebá fakuldade hamutuk 7 hanesan Saúde, Edukasaun, Agrikultura, Enjeñaria, Ekonomia, Direitu ho Siénsia e Polítika.
1,279 total views, 6 views today
