DILI (timorpost.com) – Projetu konstrusaun edifísiu foun Eskola Ensinu Sekundáriu Jerál (ESG) 05 de Maiu Bekora, ne’ebé ezekuta husi kompañia MALUK UNIPESOAL, LDA. Seidauk finaliza tuir nia tempu kontratu (atrazu).
Diretór Eskola Ensinu Sekundáriu Jerál 05 de Maiu Bekora, Nicolau Adelino Ornai, hatete konstrusaun ba edifísiu foun ne’e hahú iha loron 20 Abríl tinan 2022, no sei entrega iha loron 20 Outubru 2022, maibé to’o agora seidauk finaliza.
Nia dehan, kompañia la’o la tuir Governu nia BoQ (Bill of Quantities), entaun ADN (Ajénsia Dezenvolvimentu Nasionál) hapara tiha, aumenta tan tempu adisional la hatene bainhira mak entrega.
“Ministériu Edukasaun, Juventude no Desportu liuhosi Diresaun operasionál mós kontaktu mai eskola ami atu akompaña no kontrola beibeik ba kompañia tenke aselera lalais konstrusaun ne’e”, dehan nia ba Timor Post Online iha knaar fatin Bekora, Kuarta (4/01).
Tanba ne’e, nia parte husu kompañia MALUK UNIPESOAL, LDA, atu aselera lalais servisu, nune’e estudante bele uza eskola refere, tanba ESG 05 de Maio iha sala aula hamutuk 13, entaun prejudika prosesu aprendizajen.
“Bainhira Ezame Nasionál ami sempre dezloka ba fatin seluk hanesan, Eskola Payol no Eskola Sekundáriu Tékniku Vokasionál (ESTV), tanba ami númeru estudante barak ami labele halo ezame iha ne’e”, dehan nia.
Diretór ne’e hatete, prejudika prosesu aprendizajen no tinan-tinan Eskola Ensinu Sekundáriu Jerál 05 de Maiu Bekora tuir Ezame Nasionál fatin seluk, tanba ne’e husu kompañia MALUK UNIPESOAL, LDA servisu lalais tinan ne’e remata para entrega ba eskola bele utiliza ona.
Projetu ho montante orsamentu 355,629.46 USD ne’e tuir kontratu ne’ebé estabelese entre Eskola Ensinu Sekundáriu Jerál 05 de Maiu ho na’in ba kompañia MALUK UNIPESOAL, LDA, katak tenke finaliza no entrega iha fulan-neen (6) nia laran, hahú husi loron 20 Abríl 2022 no finaliza iha loron 20 Outubru 2022.
To’o notísia ne’e Publika Jornalista Timor Post seidauk konfirma ho Na’in ba kompañia MALUK UNIPESOAL, LDA bainhira mak entrega.
1,809 total views, 9 views today
