DILI (timorpost.com) – Eskola Ensinu Sekundáriu Tékniku Vokasionál (ESTV) Bekora, Kuarta-Feira (04/01), halo Ona inskrisaun ba Estudante foun tinan letivu 2023.
“Tinan ida ne’e, ESTV simu estudante foun hamutuk 423, maibé estudante mai 600 resin, sira sei tuir teste eskrita no oral ida ne’ebé valor di’ak mak ami simu”, dehan Xefe Komisaun Organizador, Raimundo da Costa Guterres, ba Timor Post Online iha resintu ESTV Bekora, Kuarta (04/01).
Xefe departamentu Mekánika produsaun ne’e informa, simu rejistrasaun ba estudante foun durante loron ohin ho aban, estudante sei tuir teste eskrita no orál.
Manorin ne’e esplika, loloos simu 360 de’it, estudante barak aumenta tan 60 hodi atinje 420 ba estudante foun.
Nia afirma, estudante ne’ebé hakarak eskola iha ESTV tenke hetan valor Ezame Nasionál 32, matéria Siensia Naturais 7 no Matematika 7, valor la to’o eskola la simu.
“Estudante ne’ebé rejistu iha ne’e tenke ho valor média 32, Siensia Naturais 7 no Matematika 7, ami loke loron rua de’it”, katak nia.
Nia esplika, prosesu rejistu iha mós regulamentu balun, bainhira estudante la kumpre sei hetan sansaun.
“Iha pontu rua importante, karik estudante kontra regra grave liu sei bolu Inan-Aman, karik kaman uitoan ami rezolve hamutuk fó sansaun ba sira hanesan hamoos duut durante loron rua”, dehan nia.
Eskola Sekundáriu Tékniku Vokasionál nakloke ba ema hotu liuliu Munisípiu 13 inklui Rejiaun Administrativu Espesiál Oe-cusse Ambenu (RAEOA), maibé estudante mai rejistu presiza deklasaun husi eskola anterior no Ministériu Edukasaun Munisípiu nian.
Enkuantu Eskola Sekundáriu Tékniku Vokasionál iha Departamentu neen hanesan, Departamentu Sívil, Eletrisidade, Eletrónika, Informátika, Mekánika Automóvel no Mekánika Produsaun.
Nia afirma, kada departamentu akumula estudante 60-70 ba leten, barak liu Departamentu Mekánika Automóvel.
Iha biban hanesan, Diretór Eskola Sekundáriu Jerál 05 de Maio, Nicolau Adelini Ornai, informa tinan ida ne’e ESG 05 de Maio simu estudante foun hamutuk 450.
“Ami hetan orientasaun husi Ministériu Edukasaun Munisípiu tanba ami-nia sala aula limitadu tebes, tinan ida ne’e ami simu de’it 450”, dehan nia.
Manorin ne’e afirma, prosesu rejistu estudante foun hahú iha loron 19 to’o 21, simu area Cristo-Rei de’it hanesan, Hera, Darlau no Bidau.
1,580 total views, 12 views today
