DILI (Timorpost.com) – Eskola Institutu Superior Cristal (ISC), Gradua tan Estudante Finalista na’in-504, Estudante hirak ne’e kompostu husi Fakuldade Edukasaun no Saúde.
“Ohin ita hamutuk iha fatin ne’e, atu asiste serimónia graduasaun ba estudante finalista Cristal na’in-504, ba dala-XIV tinan akadémika 2022”, hateten Prezidente Ezekutivu Fundasaun Institutu Superior Cristal, Agostinho dos Santos Gonçalves, ba Jornalista sira iha salaun Sentru Konvensaun Dili, Kinta (29/12).
Prezidente ne’e afirma, durante tinan barak graduadu sira luta hasoru dezafiu oioin, ohin estudante na’in-504 liu ona rezultadu festa no haksolok.
Prezidente Ezekutivu ISC, Agostinho dos Santos Gonçalves, hatete husi total estudante na’in-504 husi Fakuldade Edukasaun 186, Fakuldade Siensia Saúde 269 no progra Mestradu 53.
“Ohin ita partisipa iha serimónia ne’e sai testamuna ba graduadu sira, tanba ne’e ita hotu nia prezensa ne’e importante tebes”, katak nia.
Agostinho dehan, Edukasaun hanesan fatór importante ba dezenvolvimentu nasionál, nune’e estudante hirak ne’e sei kontinua kontribui ba Timor-Leste.
Nia informa, Institutu Superior Cristal harii dezde tinan 1974, hodi dezenvolve Edukasaun hahú husi eskola Primária to’o Universitáriu, produs ema hamutuk rihun 55 resin, balun servisu iha Instituisaun públiku no privadu.
Entretantu partisipante másimu iha serimónia graduasaun Institutu Superior Cristal (ISC) ba dala-XIV partisipa husi, Prezidente Ezekutivu Fundasaun Institutu Superior Cristal, Agostinho dos Santos Gonçalves, Reitor ISC ho estrutura tomak, Deputuda Bankada KHUNTO, Maria Olinda Guterres no konvidadus sira.
1,346 total views, 6 views today
