Dili (timorpost.com) – Governu liuhusi Ministériu Edukasaun, Juventude no Desportu (MEJD), halo lansamentu livru ne’ebé durante Civil Society Education Partnership (CSEP) ba peskiza iha Eskola Tékniku Vokasionál sira iha Timor-Leste.
Prezidente Konsellu CSEP, Francisco de Araújo, hatete ohin hamutuk MEJD halo lansamentu sosializasaun no Relatóriu “Asesibilidade no kualidade Eskola Tékniku Vokasionál iha Timor-Leste”. Civil Society Education Partnership (CSEP) hanesan Plataforma organizasaun sosiedade sivíl iha Timor-Leste ne’ebé servisu iha setór Edukasaun liuhusi atividade monitorizasaun, peskiza no advokasia ba mudansa polítika Edukasaun.
“Atividade ohin loron nian maka lansamentu livru peskiza ne’ebé hala’o iha Agostu tinan ida ne’e, tanba ne’e iha peskiza ida ne’e ami deskobre buat barak ne’ebé ohin hakerek ona iha relatóriu ne’e”, nia dehan hafoin lansamentu livru peskiza iha Salaun INFORDEPE, Balide, Kinta (27/10).
Nia dehan, ohin entrega ona ba iha Governu hodi bele hadi’a tanba hot-hotu hatene katak, eskola tékniku vokasionál iha Timor-Leste, Eskola ne’ebé produtivu no Eskola ne’ebé produs ema atu hetan kampu servisu. Entaun iha deskobrimentu ne’ebé ohin sira deskobre katak haree ba iha Infraestrutura, Ekipamentu, Mobiliáriu, Laboratóriu no Fatin Pratika sira.
“Ita hatene katak eskola tékniku vokasionál ne’ebé agora eziste iha Timor-Leste ne’e falta iha mobiliáriu, ekipamentu, Biblioteka no fatin pratika. Entaun ho peskiza ne’ebé ohin ami deskobre, ami sujere ba MEJD, atu nune’e bele hadi’a, tanba ita hatene eskola tékniku vokasionál atu forma ema hodi asesu ba iha kampu servisu. Husi peskiza ne’e ita relata ona katak ita sei kontinua la’ós para iha de’it, maibé kada tinan ita sempre halo peskiza iha rai laran”, nia hateten.
Deskobrimentu ne’ebé sira deskobre katak presiza hadi’a hodi nune’e eleva Edukasaun ne’e ba Futuru ne’ebé iha kualidade, tanba hot-hotu hatene katak eskola eziste iha Timor ne’e, Ema hotu iha vontade atu hari, maibé lahatene nia impaktu ne’e saida.
Nia dehan, Eskola tékniku vokasionál ne’e barak liu hari husi ema individual no grupu sira, ne’ebé ba Governu hari eskola tékniku vokasionál ne’e ida ka rua de’it transforma husi ensinu báziku too Sekundáriu. Entaun ida ne’e mós presiza haree.
“Ho nune’e maka ohin iha peskiza ne’e ita hakarak hadi’a sistema, no ita rekomenda ba Governu liuhusi MEJD. Ita rekomenda sira tenke tuir saida maka ita deskobre no presiza hadi’a, tanba ita hakarak hadi’a kualidade ne’e presiza liuhusi Infraestrutura, Mobiliáriu, Ekipamentu, fatin pratika no Biblioteka buat sira ne’e ita hakarak hadi’a, hodi garante kualidade”, nia hakotu.
1,201 total views, 3 views today
