DILI (timorpost.com) — Prezidente Repúblika (PR), José Ramos Horta, partisipa iha ámbitu “Conferência Naçionál Subsídio de Ideias para Construir A História de Rezistência Naçionál de Timor entre 1974-1975” ne’ebé organiza husi Komité Orientadór 25 (CO25) Constâncio Pinto, iha Ministériu Defeza, Fatu-hada, Tersa (25/10).
Xefe Estadu dehan, semináriu ida ne’e importante tebe-tebes, esforsu di’ak lideradu husi Komité Orientadór 25 (CO25) Constâncio Pinto, atu hakerek istória papél juventude sira nian.
“Ami uluk ho nivel Sekundária de’it, universidade laiha. Ami uluk ain tanan de’it ko’alia lian Portugés, Inglés la moos tanba ho idade 23-24 balun laiha serbisu, ema bolu ami badiu, estudante la hun la dikin, maibé sentimentu fuan mak ba dignidade povu nian ne’ebé iha direitu ba auto determinasaun ba liberdade,” PR Horta relata.
PR Horta haktuir, husi sira-nia mehi, maibé la mehi de’it, sira book aan atu organiza primeiru ASDT, FRETILIN ho lideransa boot rua ida mak Avó Xavier ho Avó Nicolau Lobato.
“Avó Xavier hanesan figura ida patriarkál no Nicolau Lobato figura intelektuál ho espíritu luta matenek, espíritu organizasaun no dixiplina. Sira na’in rua konsege duni dada no dudu ASDT ho FRETILIN ba oin, tanba bainhira Avó Xavier no Nicolau Lobato laiha ne’ebá, la’ós Ramos Horta, la’ós Mari Alkatiri ka Abílio Araújo bele dada povu ne’e, hodi orienta povu ne’e ba luta maibé ami hotu-hotu kontribui ho ami-nia idade ho mehi hodi halo planu nasionál ba Timor-Leste hetan independénsia,” Xefe Estadu afirma.
Enkuantu relasiona ho ida ne’e, Xefe Estadu husu ba Juventude Timor-Leste atu estuda, maski hasoru difikuldade oin-oin.
“Ba ita-nia joven sira, oportunidade iha oin barak atu estuda, maski iha difikuldade oi-oin maibé la liu difikuldade sira ne’ebé uluk joven rezisténsia sira enfrenta,” PR Horta realsa.
Nia dehan, Ohin loron oportunidade di’ak liu, tanba mundu modernu buat oi-oin atu estuda iha internet, Google no Governu rasik fó bolsa estudu rihun ba rihun hodi ba estuda iha li’ur, rai ne’e tinan 5 ou 10 mai tan sei sai di’ak no boot hanesan rai sira seluk iha ASEAN, maibé foin sa’e sira tenke aproveita hahú agora, prepara imi-nia kakutak, imi-nia koñesimentu tanba joven sira imi mak futuru ba rai ida ne’e, tanba jerasaun tuan sira la’o daudauk ona ba to’o iha loron tun.
“Joven barak iha ona espíritu oinsá atu luta hodi kontribui ba dezenvolvimentu País nian. Joven barak iha espíritu patriotizmu no orgullu hanesan Timoroan, hodi kontinua lori misaun ho responsabilidade atu sente katak, ha’u Timoroan, ha’u rai ne’e nia oan, ha’u hakarak ha’u-nia rain ukun rasik aan, ha’u hakarak ha’u-nia rain dezenvolve, tanba ne’e ha’u sei estuda kontribui ba rai ida ne’e,” PR Horta hakotu.
2,750 total views, 3 views today
Bele hare Video Seluk :
Subscribe to Timorpost
