DILI (timorpost.com) – Mosu inséndiu iha eskola Paulo VI, mais ou menus oras tuku 11:15 otl, meiudia tanba deskonfia mosu sirkuitu fiu eletrisidade.
“Akontesimentu ne’e ami lahatene, tanba aula estudante la’o hela, derrepente mosu ahi lakan iha parte ne’ebá ne’e mak halo estudante no professores sira hakfodak halai sai hotu husi eskola laran, entaun ami lori vazu ai-funan lori tuda para hatún ahi lakan no Bombeiros sira mai rega tan mak ahi mate” haktuir professor Manuel de Fátima ba jornalista TimorPost iha Resintu eskola Paulo VI-Bidau, sesta (30/09).
Tuir professor ne’e, akontesementu ne’e Deskonfia tanba mosu sirkuitu husi fiu eletrisidade.
“Ami sei fó férias ba estudante sira feriadu loron rua, tanba ami nia tékniku sira sei normaliza hikas fiu eletrisidade sira normal hotu mak, bainrua sira tama fali eskola”. Hateten Professor ne’e.
Iha akontesimentu ne’e, parte Bombeiros to’o kedas iha fatin refere hodi normaliza inséndiu ne’e.
Hafoin Timor Post tenta atu konfirma ho ekipa Bombeiros, maibé sira nia parte lá fo komentáriu tanba preokupa ho Servisu seluk.
Enkuantu tuir informasaun, tékniku husi eskola Paulo VI rasik mak sei halo instalasaun rasik ba fiu ne’ebé sirkuitu.
2,470 total views, 3 views today
Bele hare Video Seluk :