Lautem (Timor Post) – Eskola Ensinu Bázika Filial (EBF), no. 17, Irá-lafai, Suku Bauro, Postu Administrativu Lospalos, Munisípiu Lautem, falta profesór produtivu hodi hanorin estudante sira.
Koordenadór Eskola EBF no.17, Irá-lafai, Calisto dos Santos Alegria, hatete sira enfrenta problema menus profesór.
“Ami sempre obedese ba regulamentu ne’ebé hosi klasse altu hanesan Ministeriu Edukasaun hato’o mai ami, katak presiza hanorin estudante tuir kurríkulu ne’ebé iha”, nia hateten ba Timor Post, iha nia kna’ar fatin, Kuarta (10/08).
Nia dehan, funsionáriu nu’udar profesór no profesora hamutuk na’in-ualu, maibé mesak idade Idozus hotu, no daudaun ne’e balun hetan moras todan, entaun ladún ativu.
“Kestaun ida ne’e ami hato’o ona ba Ministériu relevante, maibé nunka tau konsiderasaun, no ami husu ba sira katak aumenta funsionáriu hodi mai hanorin, ka bele troka ami-nia fatin, tanba ami hot-hotu mesak idade Idozus, maibé klasse superior sira konsidera kesatuan ne’e la seriu”, nia informa.
Kona-ba fasilide ka materiál ne’e iha oinsá uza hodi fasilita estudante sira, no estudante hahú hosi Primeiru Ano to’o Sestu Ano, ho total atus-neen-resin (600) tanba ne’e mak ami husu Ministériu relevante atu halo mudansa ba kestaun profesor la to’o.
“Ami-nia hakarak mak presiza aumenta profesor ou profesora, tanba ami mós hakatak reforma ona, tanba idade Idozus, Profesór balun hetan moras todan, no dala-ruma profesor ida mak uza prense nia tempu hanorin klasse tolu lae haat,” nia sublina.
Nia hatutan, edukasaun sai hanesan save importante ba ema ida atu transforma nia aan, no muda nia a’an, hodi halo dezenvolvimentu ba ema hotu no mós nasaun, maibé laiha Funsionáriu nu’udar profesór ka profesora di’ak, kakutak murak, ne’ebe hanorin estudante ho kreativu, oinsá Estudante sira atu muda an.
Tanbá ne’e ikus liu nia rekomenda nafatin ba Ministeriu Edukasaun, Juventude no Desportu (MEJD), atu tau iha konsiderasaun hodi bele resolve problema ida ne’e.
2,745 total views, 3 views today
Bele hare Video Seluk :