Dili (Timor Post) – Primeiru Ministru (PM), Taur Matan Ruak, Kinta (04/08), halo lansamentu ba programa hitu (7) iha EBC 30 de Agusto, Komoro.
Programa hitu ne’e maka, Eskola ba Uma, Bolsa de Meritu, Internet, Eskola de Rais, entrega Matéria Eskola nian hanesan livru no Karteira.
“Ha’u kontente loos, rona estudante sira husi Café, ohin kanta iha ne’e, no ha’u fixa hela liafuan ida hatete, “Sou Melhor, Sou Maior, Vou Lutar até ao Fim”, ida ne’e mak ita hotu tenke halo, espiritu ida ne’e maka orienta Jornada ita-nia nasaun nian, no povu nian,” nia diskursu iha serimónia lansamentu ne’e.
Nia realsa, se estudante sira haree ema sira ne’ebé agora tuur iha oin, ne’e uluk mesak labarik hotu hanesan ne’e.
“Sei ita boot sira haree ami sira ne’ebé tuur iha ne’e uluk labarik hanesan ita boot sira, ami luta makaas mós iha kondisaun, iha Ambiente ne’ebé diferente ho difikuldade tomak para ohin ida-idak konkista nia fatin iha sosiedade, no bele fó kontribui ba dezenvolmentu ita-nia nasaun nian,” nia dehan.
Nia haktuir, ko’alia kona-ba responsabilidade ida-idak nian, responsabilidade Governante sira nian, Profesor sira nian, inan-aman nian, mais liu-liu responsabilidade oan sira nian.
“Timor-Leste presiza Prezidente ida di’ak, Primeiru Ministru ida di’ak, Ministru ida di’ak, Engineriu ida di’ak, Pilotu ida di’ak, Profesor ida di’ak, no sira ne’e ita hahú prepara agora. Ha’u-nia oan estudante sira, ita boot sira seidauk hatene imi ba ne’ebé to’o loron ne’ebé imi hatene katak, afinal ha’u atu sai Profesór, Prezidente, Pilotu, Engineiru, no ha’u sai Ministru,” nia relata.
Governu iha responsabilidade para kria kondisaun hotu-hotu, hodi kontribui ba ita boot sira-nia aprendizajen, atu ajuda oan sira, para konkista imi-nia fatin iha tenpu oin mai. Profesor sira mós iha responsabilidade boot tau matan ba imi, hanorin didi’ak, inspira imi, jere eskola didi’ak atu kria ambiente ne’ebé di’ak iha eskola para imi bele aprende.
“Imi-nia Inan-Aman sira mós iha responsabilidade, tau matan ba imi, haruka ba eskola, tau matan ba imi-nia serbisu sira iha uma, labele falta serbisu ne’ebé Profesor sira fó ba ita boot sira tenke kumpre, enkoraja imi para mai eskola, ne’e hotu-hotu kontribuisaun de’it, mais imi mak determina imi-nia destinu, no imi mak determina imi-nia futuru”, nia hateten.
Nune’e, imi-nia futuru sei la fó husi bandeza ba imi, imi nia futuru imi konkista rasik, tempu ne’e imi nian, futuru ne’e imi nian, kada jerasaun iha responsabilidade ho ninia kontribuisaun tuir kbiit ne’ebé iha.
2,766 total views, 3 views today
Bele hare Video Seluk :