DILI (Timor Post)—Ministériu Administrasaun Estatál (MAE), hamutuk ho parseiru Estadus Unidus Amérika (EUA), ohin hala’o workshop kona-ba importánsia hametin kualidade edukasaun no redús má-nutrisaun liuhusi Programa Merenda Eskolár ne’ebé adere ona ba movimentu hadi’ak nutrisaun (Scaling up Nutrition Movement, SUN Movement).
“Programa VIII, hatete fortalesimentu mekanizmu merenda eskolár ba nutrisaun, saúde, edukasaun, ba menóridade hanesan labarik sira hotu, sai moris saudavel no seguru”, dehan Vise Ministru MAE, Lino Torrezão, hafoin diskursu iha Workshop Nasionál, iha Novo Turizmu, Kinta (14/07).
Objetivu Governu Timor-Leste iha Programa Merenda Eskolár (PME) nasionál ba alunu hotu iha ensinu báziku (klase 1-9) hanesan insentivu atu aumenta alunu nia prezensa iha eskola, hasa’e alunu nia asesu ba hahán nutritivu no fó estímulu ba ekonomia lokál.
“Liuhusi programa merenda eskolár ita aumenta benefísiu nutrisaun ba labarik sira bainhira PME implementa, iha impaktu pozitivu tebes hodi hamenus falta alunu nian, aumenta alunu nia atensaun no partisipasaun iha aula sira no mós bele hamenus hamlaha tempu badak ho refeisaun ne’ebé nutritivu”, nia hateten.
Entretantu, Workshop ne’e rasik hetan partisipasaun husi, Ministru Administrasaun Estatál (MAE), Reprezentante Embaixada EUA iha Timor-Leste, Presidente Komisaun F no G Parlamentu Nasionál, Diretór CARE Internasionál, Asesór Primeiru Ministru no Pontu Fokál ba Movimentu Hadi’ak Nutrisaun, no Reprezentante husi Komisaun Anti Korrupsaun, Provedora Direitu Humanus no Justisa (PDHJ), Camâra de Contas, Tribunal de Rekursu, Diretór Jerál no Diretór Nasionál husi Ministériu Edukasaun, Juventude no Desportu (MEJD) no mós parseiru dezenvolvimentu sira.
Iha workshop ne’e, Ministériu Administrasaun Estatál, fahe planu no aumenta investimentu iha Programa Merenda eskolár ho proposta aumenta hosi 25 sentavu ba 42 sentavu ba kada merenda ba alunu ida-idak, iha loron ida.
Alende ne’e reprezentante Water Aid, Cipriano do Rosario Pacheco, hatete, Programa Merenda Eskolár nia polítika no fasilita oinsá bele prevene korrupsaun hodi masimiza orsamentu Estadu nian ba benefísiu alunu Timor-oan.
“Program PME ne’e durante tinan lima ne’ebé implementa liuhosi CARE, Mercy Corps no Water Aid ne’ebé parseria ho MEJD, Ministériu Saúde, Ministériu Administrasaun Estatál no Ministériu Agrikultura no Peska”, nia hateten.
Programa Merenda Eskolár agora haforsa tan kualidade iha munisípiu haat hanesan Munisípiu, Ainaru, Ermera, Likisá no Manatutu.
USDA-HATUTAN, iha programa ida ho finansas husi Departamentu Agrikultura nian husi Governu Estadus Unidus Amérika (USDA), iha inisiativa bolu McGovern-Dole Ai-han Ba Edukasaun iha Timor-Leste. Programa HATUTAN objetivu atu hadi’ak liután literasia ba labarik sira idade eskola nian, no hadi’ak liután prátika saúde, nutrisaun no dieta sira iha eskola 453 HUSI 2019 to’o prezente no ninia komunidade besik eskola iha munisípiu Ainaru, Ermera, Likisá no Manatutu.
“Tinan ne’e ita fahe ona 3.098 tonelada métriku (TM) husi ai-han doadór 2.072 TM foos fortifikasaun. 731 TM koto makerek no 296 TM mina vejetál fortifikasaun ho rezultadu apoiu ona ho 17.733.401 refeisaun ba alunu na’in 89.987”, nia hakotu.
2,102 total views, 3 views today
Bele hare Video Seluk :
Subscribe to Timorpost
