DILI (Timor Post)—Arsebispu arkidioseze Metropolitana Dili Dom Virgílio do Carmo da Silva, ho ekipa hasoru malu ho Primeiru Ministru (PM) Taur Matan Ruak, hodi partilla informasaun kona-ba prosesu atu hari universidade Katólika.
“Ohin ami ekipa oan ida husi Arkidioseze Dili, ami halo audiénsia ho exelénsia Primeiru Ministru, tanba ami hakarak atu atualiza uitoan informasaun kona-ba ami aprezenta ona dokumentu atu ba kriasaun universidade katólika Timorénse”, Dom Virgílio informa hafoin remata enkontru ho Primeiru Ministru, iha rezidensiál Faról, Sesta (13/08).
Dom Virgílio dehan, maski lisensa Ministériu Ensinu Superior sei estuda hela, maibé hakarak partilla ba Primeiru Ministru, kona-ba inisiativa ida ne’e.
Tuir Na’i Lulik ne’e katak, inisiativa atu hari universidade katólika ne’e, la’ós mai husi nia, maibé mai hahú kedas kuaze tinan 20 liubá, iha kedan Dom Carlos Filipe Belo nia tempu, no iha 2002 forma ona ekipa ida atu halo estudu viabilidade, depois Carlos rezignasaun para tiha, mai fali iha Don Alberto Ricardo, komesa ona tau primeiru pedra iha Balidi, hafoin Alberto Ricardo mate buat hotu para tiha.
“Ha’u tama mai iha 2016, ami koko atu kontinua, maibé iha momentu ne’ebá tanba buat barak liu, entaun ha’u laiha korajen hala’o ida ne’e, maibé durante tinan lima ne’e nia laran kontinua halo aproximasaun husi dalan oioin, ikus mai ami haree katak ida ne’e la’ós de’it ona ha’u-nia hakarak no ema ida nia hakarak, maibé ida ne’e hanesan nesesidade ida presiza no lori duni ba iha realizasaun”, Dom Virgílio afirma. (jry)
744 total views, 3 views today
Bele hare Video Seluk :
Subscribe to Timorpost
