Dili(timorpost.com)—Prezidente Klube Nagardjo Fc no Fitun Estudante Lorosa’e (FIEL) Fc, deside la-kontinua jogu ne’ebé mak paradu iha semana kotuk liubá.
Deklarasaun ne’e hato’o hosi, Diretór Relasaun Publika Liga Futeból Timor-Leste (LFTL), Diego Neto Fraga, iha estádiu munisipál Dili, hafoin remata enkontru ho parte klube Nagardjo Fc ninian ho FIEL Fc, inklui mós órgaun LFTL no arbitrajen sira.
“Sim ohin ita bolu parte klube rua nian mai hamutuk ho parte LFTL no arbitrajen ninian, mai hodi foti konkluzaun atu jogu kontinua fali ka oinsá, maibé sira nia parte hosi klube rua dehan, labele kontinua ona no ekipa rua empate de’it”, dehan Diego Neto Fraga, ba Timor Post iha Estádiu Munisipál Dili, Segunda (20/03).
Nia hateten, tanba desizaun ne’e mútua hosi klube rua nian, entaun parte arbitrajen no órgaun liga mós konkorda, tanba ne’e mak jogu ne’e sei la iha tan ona kontinuasaun, tanba klube rasik mak foti desizaun liuhosi prezidente klube sira.
Tuir nia, ho ida ne’e iha semana oin ekipa rua sei kontinua ba joga jornada seluk, tanba jogu semana kotuk ne’ebé mak paradu ne’e sira deside mantein de’it ho rezultadu empate 2-2, hodi ekipa rua fahe pontu ba malu de’it
“Nune’e iha sorumutu ne’e mós Prezidente klube rua husu deskulpa ba adeptu futeból tomak iha Timor laran tomak, tanba liuhosi dezentendimentu entre klube rua ho arbitrajen nune’e jogu labele termina tuir tempu normal, maibé para de’it iha klaran”, nia hateten.
Fó hanoin fali katak, insidente ne’e akontese hafoin arbitrajen foti desizaun ba ekipa Nagardjo ladún balansu, tanba iha jogu primeiru parte jogadór FIEL Fc lori liman kaer bola ka dudu bola sai arbitrajen la fó penalidade ba sira, maibé bola kona-ba jogadór Nagardjo nia liman fora hosi grander laran nia foti desizaun hodi fó penalidade ba FIEL Fc, nune’e mosu dezentendimentu ne’e.
Nune’e sira konsidera árbitru la hatudu nia profisonalidade no neutralidade iha jogu refere no foti desizaun arbiru no laiha konsultasaun rua hosi arbitrajen rezerva sira inklui liña sira iha parte sorin no karuk hodi foti desizaun hakarak hamonu ekipa Nagardjo Fc iha jogu refere.
Tuir observasaun ne’ebé mak Timor Post haree, situasaun ne’e akontese hafoin Prezidente klube Nagardjo Fc, Artur da Luz Costa, la satisfás ho arbitrajen ne’ebé mak lidera jogu foti desizaun sala, tanba bola falta iha li’ur, árbitru hatudu fali iha grander laran hodi fó penalidade ba ekipa Fitun Estudante Lorosa’e Fc.
Nune’e nia parte la simu no halo kritika makaas inklui riba kadeira no tuda kadeira iha fatin VIP tribune estádiu munisipál ninia tun mai iha kraik, Iha ne’ebé insidente ne’e Prezidente klube Nagardjo Fc, tuda kadeira rua hosi tribune leten hosi VIP nia tun mai kraik no kadeira rua ne’e konsege rahun.
1,838 total views, 3 views today
Bele hare Video Seluk :
Subscribe to Timorpost
