DILI (timorpost.com) – Delio Amozinho, hosi Modalidade Boxe, promete sei hetan medalla osan mean iha jogu internasionál Sea Games 2023, ne’ebé sei realiza iha Kambodia.
Boksista ne’e, hatete daudaun nia naran kontinua tama iha selesaun Atleta Nasionál husi Federasaun BOXE Timor-Leste, hodi ba partispa iha jogu Sea Games 2023, ne’ebé sei realiza iha Kambodia fulan hirak ba oin.
“Ami-nia preparasaun ba jogu Sea Games la’o hela, agora ami hahú treinu full fali ona semana rua, maibé durante ne’e nia parte mós kontinua prepara an ho di’ak,” dehan Boksista Delio, iha Benfica Dili, hafoin halo hela nia preparasaun, Segunda (09/01).
Nia aumenta, tanba hanesan atleta tenke prepara an mós liuhusi individu la’ós hein de’it Estadu, maibé hanesan atleta tenke hatene an no treinu mesak mós iha uma ou iha fatin ne’ebé de’it.
Nia subliña, tanba ne’e nia agora preparadu hodi hasoru jogu ida ne’e, tanba iha tinan kotuk hetan de’it medalla osan mutin, ka sai hanesan segundu lugar iha jogu Sea Games, ne’ebé realiza iha Vietname 2022.
“Ha’u-nia hakarak ne’e tinan kotuk hetan Primeiru lugar, maibé ita-nia sorte laiha ita hetan de’it segundu lugar, ida ne’e mós ha’u agradese tebes, maibé ha’u fiar katak tinan ida ne’e ha’u tenke hetan Primeiru lugar,” nia promete.
Nia esplika, tanba ne’e nia parte agora sei halo preparasaun ida ne’ebé di’ak liután inklui esperiénsia sira ne’ebé hetan iha jogu Sea Games tinan kotuk, bele alkansa objetivu iha tinan ida ne’e.
Nia dehan, maski ho kondisaun rai laran no fasilidade ne’ebé mínimu tebes, maibé konsege sai Segundu Lugar, entaun esperiénsia segundu lugar tinan kotuk sei motiva liután hodi hetan Primeiru lugar iha tinan 2023 liuhusi Sea Games ne’e.
Fó hanoin fali katak, jogu Sea Games sei realiza iha Kambodia entre fulan Maiu ka Juñu nia laran, enkuantu Timor-Leste sei partispa ho modalidae (8), inklui ho Modalidade Boxe.
2,480 total views, 3 views today
Bele hare Video Seluk :
Subscribe to Timorpost
