DILI (timorpost.com) – Federation International Football Association (FIFA), haruka osan ho montante rihun 80 USD mai Federasaun Futeból Timor-Leste (FFTL), atu sosa tiket aviaun ba jogadór Selesaun Nasionál sub-16 ba joga iha Tajikistan.
“FIFA aloka duni osan mai ita, maibé tenke halo jestaun loloos no sira hatán mak foin ita bele la’o bainhira la hatán entaun ita labele obriga an, ita tenke la’o tuir regulamentu ne’ebé iha FIFA, Osan ne’ebé FIFA provide ba ita ne’e rihun 80 USD, hodi sosa billete ba jogadór no ofisiál sira hamutuk ema na’in-31,” dehan Prezidente Federasaun Futeból Timor-Leste, Francisco Jerónimo, iha Faról Segunda (03/10).
Nia dehan, relasiona ho jogadór sira labele ba joga iha Tajikistan ne’e, razaun tiket mak karun liu nune’e mós aviaun mak difisil, tanba iha Timor-Leste aviaun loron ida halo vó dala ida de’it.
“Pedidu ne’ebé submete ba FIFA dehan as liu no tenke buka dalan seluk, tanba ne’e ha’u rasik hakerek karta ba AFC atu provide tiket ba ita liuhusi dalan AFC nian, tanba sira iha travel Agency maibé sira mós labele apoiu nune’e ha’u husu fali ba FIFA maibé sira resposta hanesan de’it, nune’e ho presu tiket ne’ebé karun ne’e ita atu ba buka fali iha ne’ebé ita tenke realistis tanba aviaun iha Timor loron ida vó dala ida de’it,” deklara nia.
Ministru MAPKOMS ne’e subliña, sira-nia parte mós kontinua tenta husu tan apoiu Federasaun Futeból Tajikistaun atu apoiu kona-ba provide tiket, maibé sira hatán bele, maibé depois husu tiket, sira dehan aviaun labele tanba tula de’it ema na’in-15 no tenke fahe ba grupu rua.
“Entaun ami dehan se hanesan ne’e jogadór sira mós oin foun foin atu ba iha ne’ebá laiha esperiénsia ba Tajikistaun depois hasoru problema se mak atu responsabiliza. Tanba ne’e hanesan Prezidente FFTL, ha’u lakohi ha’u-nia jogadór sira atu hetan problema ruma, tanba bainhira hetan problema ema dehan Prezidente mak laiha kapasidade atu rezolve problema,” deklara nia.
Relasiona ho kanselamentu ida ne’e, Inan-Aman no família Jogadór sira iha loron hirak liubá to’o kedas iha edifísiu Federasaun Futeból Timor-Leste (FFTL) Bairru Grilhos hodi halo kritika maka’as.
Fó hanoin fali katak, tuir oráriu ekipa Selesaun Nasionál Timor-Leste sub-16 sei partisipa jogu kualifikasaun Taxa Asian Futball Confederation (AFC), Asian sub-17 iha loron 28 fulan Setembru tinan 2022 iha Tajikistan.
Enkuantu Timor-Leste tama iha grupu (H), hamutuk ho nasaun sira hanesan Tajikistan, Afghanistan no Mongólia, maibé Timor-Leste deside halo kanselamentu no la tuir kualifikasaun Taxa AFC tinan 2022 ida ne’e.
3,902 total views, 3 views today
Bele hare Video Seluk :
Subscribe to Timorpost
