Dili (timorpost.com) – Governu Timor-Leste liuhusi Sekretáriu Estadu Juventude Desportu (SEJD), servisu hamutuk ho Kooperasaun Internasionál Koreia (KOIKA) fó Treinamentu ba Joven sira na’in-23 hodi sai Treinadór kona-ba area desportu iha Timor-Leste.
Diretór Jerál Sekretáriu Estadu Juventude no Desportu (SEJD), David Tomas de Deus, hatete ohin sira halo abertura ba segundu formasaun Coaching Training ba treinadór sira ne’ebé liuhusi KOIKA halo ona selesaun hili sira na’in-23 mak tuir treinamentu durante semana ida hodi sai treinadór.
“Intensaun husi formasaun ne’e ita fó treinu ba treinadór sira ne’ebé ho koinesimentu ne’ebé ho pozitivu atu nune’e bele kontinua apoiu Governu, apoiu federasaun no apoiu dezenvolvimentu espesifiku ba Futeból Juvenil ba ita-nia labarik sira iha Timor-Leste,” nia hateten iha salaun Lux Clarita Bidau Lesidere, Segunda (19/09).
Nia dehan, ida ne’e servisu hamutuk entre Governu, Sekretáriu Estadu Juventude no Desportu (SEJD) ho KOIKA, halo kooperasaun ho sira hodi intermus kapasitasaun rekursu umanu mak sira tenke fó formasaun ba joven sira, no iha seluk mós KOIKA fó apoiu ba infraestrutura ba area desportu nian.
Portantu formasaun ne’e foka liubá area 6 oinsá mak sira kompriende kona-ba labarik ho direitu ba labarik sira nian, teoria kona-ba formasaun ba joven sira, oinsá timbili ho komunikasaun nian, aspeitu jender area desportu nian, prinsípiu husi nutrisaun, ida ne’e importante ba treinadór sira no mós alin sira iha rai laran.
“Tanba ne’e liuhusi formasaun sira ne’e mak ita fó ba treinadór sira, para depois sira bele kontinua kaer ita-nia alin sira liuhusi formasaun ne’ebé ohin sira hahú hetan ona durante semana ida”, nia katak.
Iha fatin hanesan Field Manajer Kooperasaun Internasionál Koreia (KOIKA) MinYoung Lee, aumenta sira KOIKA fó treinamentu preparasaun ba Treinadór sira ne’e tinan 2022, ida ne’e ba dala-2 nian, maibé uluk fulan Maiu tinan ne’e sira halo ka fó formasaun tiha ona ba treinadór na’in-20, agora fó treinamentu tan ba dala-2 nian mak hamutuk 23.
“Treinadór sira ne’e mós tenke hatene no fokus parte hot-hotu la’ós joga bola de’it, agora ami halo selesaun ba treinadór sira hamutuk 23 ne’e, kompostu feto na’in-6, mane-17 mak liuhusi selesaun hodi tuir treinamentu formasaun ne’e”, nia dehan.
Nia salienta, Timoroan sira gosta area desportu hanesan joga bola, sira mós hakarak aprende maibé dala-ruma treinadór mak ladún di’ak tanba ne’e sira ne’ebé hili presiza aprende tan hodi aumenta konesimentu.
“Iha formasaun ne’e la’ós joga bola de’it ho ida ne’e ami-nia treinamentu iha laran kona-ba nutrisaun mós iha, Igualdade jeneru mós iha, no seluk tan, ho nune’e ha’u espera ohin sira hahú treinamentu durante semana ida ba na’in-23 ne’e sei aprende di’ak liutan, hodi fahe fali sira-nia konesimentu ba labarik ka joven sira seluk ho kualidade,” nia garante.
1,402 total views, 3 views today
