DILI (Timor Post) – Atleta husi Komité Paralimpiku Nasionál Timor-Leste (CPNTL), ne’ebé hetan medalla hamutuk 12 iha jogu Sea Para Games iha Indonézia, Primeiru Ministru Taur Matan Ruak, simu ho Matan been.
“Imi-nia prestasaun ida ne’e Governu liuhusi SEJD mak sei oferese saida ba imi ha’u la hatene, maibé ha’u fó Karau ida ba imi hodi imi halo festeza ba imi-nia konkista ida ne’e,” dehan Primeiru Ministru, Taur Matan Ruak, bainhira simu Atleta sira iha Palásiu Governu, Segunda (09/08).
Nia reforsa, nia parte kontente loos tanba atleta sira hamorin Timor-Leste nia naran iha jogu ida ne’e, nune’e Karau ne’e nia parte hanesan fó prémiu individu ba atleta no delegasaun tomak hodi halo festeza.
“Ha’u kontente loos tanba ne’e ha’u tanis no pesoál ha’u fó Karau ida ba imi, depois fila parte Komité Paralímpiku bele kontaktu mai ha’u-nia gabinete hodi bele foti Karau ne’e atu imi bele festeza,” hateten nia.
Eis Prezidente Repúblika ne’e subliña, nia parte fó parabéns lori Governu no Estadu nia naran inklui mós povu Timor-Leste tomak nia naran ba sira-nia konkista ida ne’e, liuliu ba atleta sira ne’ebé hetan medalla.
“Imi hanesan fó ezemplu ida mai ami hotu inklui ha’u, tanba imi ho defisiénsia no difikuldade barak ne’ebé iha, maibé imi hatudu katak imi bele, tanba sa ami sira ho kondisaun di’ak no saúde di’ak labele, entaun imi hatudu ezemplu di’ak ba ami hotu,” hateten nia.
Nia dehan, tanba tinan-20 ukun an ona, maibé foin dahuluk kontijente sira mai lori medalla ho karon no barak, ida ne’e hatudu katak imi bele.
1,341 total views, 6 views today
Bele hare Video Seluk :
Subscribe to Timorpost
