Dili, (TN.net) –Prezidente Repúblika Francisco Guterres Lú Olo apresia no agradese Embaixadora Estadus Unidus Amerika Kathleen Fitzpatrick durante hala’o nia misaun iha Timor-Leste.

Prezidente Repúblika haksolok tebes ho relasaun bilateral entre Timor-Leste no Estadus Unidus Amerika ne’ebé husi loron ba loron sai metin babeibeik. Ba esforsu embaixadora nian iha Timor-Leste hodi hametin relasaun entre nasaun rua, Prezidente Repúblika hateten:

“Fini ne’ebé ita kuda iha Timor-Leste sei sai buras babeibeik.”

Prezidente Repúblika fó nia apoiu tomak ba programa Governu Estadus Unidus Amerika Milenium Cooperation Challenge hanaran Compact hodi fó asisténsia ba Timor-Leste. Prezidente Repúblika fiar katak ho programa ne’e sei tulun Timor-Leste atu hakat ba oin ho forte liután iha situasaun pandemia COVID-19 nia laran.

Pandemia COVID-19 ne’ebé mosu lori konsekuénsia oioin iha nível global no ba Timor-Leste. Prezidente Repúblika agradese esforsu sientista sira husi Estadus Unidus Amerika hodi deskobre vasina ba coronavirus ne’ebé sei iha prosesu dezenvolvimentu. Prezidente Repúblika hateten vasina ne’ebé iha prosesu dezenvolvimentu sei bele utiliza iha tempu badak nia laran. Deskobrimentu vasina COVID-19 ne’ebé iha prosesu dezenvolvimentu sei sai kontribuisaun boot ba umanidade.

Embaixadora hateten katak onra boot bele serbisu iha Timor-Leste hodi kontribui ba hametin relasaun nasaun rua nu’udar parseiru atu atinji objetivu dezenvolvimentu nasionál. Reprezentante diplomátika orgullu atu serbisu iha Timor-Leste iha área dezenvolvimentu agrikultura, saúde, diversifikasaun ekonómiku, seguransa, demokrasia, justisa, defeza no juventude.

Kathleen Fitzpatrick kongratula Timor-Leste ne’ebé susesu jere moras coronavirus. Governu Estadus Unidus Amerika hola parte iha prevensaun no kontrolu COVID-19 liuhusi oferese apoiu ba fatin izolasaun no kuarentena no ekipamentus.

Embaixadora Kathleen Fitzpatrick sei remata nia misaun diplomátika iha Timor-Leste. Audiénsia ne’e atu informa relasaun diplomátika entre nasaun rua no despede Prezidente Repúblika.

MÍDIA PR.

Leave a comment

Your email address will not be published. Required fields are marked *