O……….hau belun joventude 12 de Novembru,

Loriku aswain Rai doben Timor Leste, tragedia 12 de novembru,

Sai memoria furak mai ami jerasaun foun, memoria neebe dada ami hodi tane-as justisa no lia los. Tinan ba tinan ami comemora loron historiku ne’e, hodi hafanu ami laran no hanoin nafatin, domin no aten brani husi ita boot sira nia sacrifica-an, Halo eziste ona nasaun República Democrática de Timor-Leste,

O…hau belun joventude 12 de novembru,…. Ami rekuinhese ami selu labele lembransa neebe imi husik hela mai ami, Tulun ami jerasaun foun, atu ami valorize nafatin ita boot sira nia kosar ben, matan ben no ran fakar nakfilak ba bé matan, Be matan neebe lori moris……… Tulun ami… atu ami jerasaun foun hatene-an katak, Tempo juventude nu’udar tempo osa mean hodi espresa ami nia energia hodi halo buat diak ba Rai doben Timor-Leste.

Tulun ami….. atu ami halakon ami nia hahalok baruk ten no falta respeitu, tulun ami atu bele kontrola-an husi ransu libre…..

O…………hau belun Joventude 12 de Novembru, tulun ami atu esforso-an hodi konsola inan-aman sira, no la hakanek sira laran

Tulun ami atu ami halo buat diak ba ami nia inan-aman, la halo sira nia domin saugati hodi sai ema oan ne’ebe diak iha moris lor-loron.

O…… hau belun Joventude 12 de Novemvru, tulun ami atu ami iha aten brani utiliza maximu forsa neebe ami iha, hodi lori roman dame ba ema hotu, la’os lasu no hamonu ema ba nakukun no violensia,

Tulun ami…. Atu ami hatene ami nia identidade jovem nee mak identidade espresa domin; Tulun ami atu ami hadomi ami nia futuru, halo ema seluk sai ami nia amigo, la’os muda amigo sai inimigo, tulun ami…. Atu ami nia presensia nuudar Joventude:lori hamnasa no haksolok, la’os hakanek no halo ema tanis, atu cria unidade, la’os odio no laran moras hodi harahun unidade moris nian.

Tulun Ami….. atu ami jovem sira hatene no fiar katak: se mak falun-an ho hahalok at;  nia sei falha iha nia moris, sé mak falun-an ho hahalok at, terus no tanis sei sai amigo diak ba nia, se mak halo diak no los nia mak sei susesu ba moris, nia mak na’in ba paz, nia mak na’in ba moris haksolok,

O……….. hau belun joventude 12 de Novembru, imi nia luta sai evidensia istoriku katak identidade juventude mak: Hadomi lia los, la’os habelar lia falsu, haraik-an, la’os arogante, laran luak, la’os kan ten no karak ten

O….. hau belun Joventude 12 de Novembru,…

Tulun Ami…… Atu ami hariku-an ho koñesementu iha ukun-an hodi esplora riku soin rai laran,  Atu nune’e ami mak sai na’in la’os atan bariku soin rai doben Timor-Leste nian. Tulun Ami…….. atu ami jerasaun foun, ho koñesementu ne’ebe ami iha sai nuudar osan mean ba familia, lalenok ba sosiedade, no airin ba Rai doben Timor Leste

Viva Joventude12 de Novembru

Viva Joventude hadomi paz.

Viva  joventude Timor Leste,         

Escritor: Marselinus Kali, S.Fil.B.Th (Alumni UNIKA Widya Mandira Kupang & Universitas Sanata Dharma Yogyakarta, hanorin (permanente) ihaUniversidade da Paz  & hanorin (parte tempo) iha Seminari Minor Balide

Leave a comment

Your email address will not be published. Required fields are marked *