Xefe Fundu Nasoins Unidas ba Asuntu Labarik (UNICEF, Sigla Inglés), Sra.Valerie Taton despede Ministru ba Asuntus Parlamentares no Komunikasaun Sosiál, S.E. Francisco Martins da Costa Pereira Jerónimo, Sesta-feira, loron 06 fulan-novembru tinan 2020, iha sala reuniaun MAPKOMS, Palásiu Governu, Dili.

MAPKOMS Iha sorumutuk despedida ne’e hateten durante ne’e UNICEF hala’o kooperasaun ne’ebé di’ak ho órgaun ezekutivu hahú husi primeiru governu to’o ohin loron.

Ezekutivu ne’e hein katak susesór ne’ebé sei troka Xefe UNICEF sesante bele kontinua kooperasaun ne’ebé hala’o tiha entre Governu Timor-Leste ho ajénsia internasionál ne’e.

Hafoin despede MAPKOMS, Xefe UNICEF hateten durante ninia mandatu, iha progresu barak mak atinje ona liuliu iha área edukasaun, esforsu redusaun mál-nutrisaun, protesaun ba labarik sira no redusaun violénsia kontra labarik sira, maibé progresu hirak ne’e presiza hadi’a nafatin nune’e bele kria kondisaun ne’ebé dignu ba labarik sira iha Timor-Leste.

Xefe UNICEF ne’e afirma nia parte hetan enerjia pozitiva barak iha Timor-Leste no nia dezeju katak enerjia pozitiva hirak ne’e kontinua mantein no bele alkansa rezultadu ne’ebé di’ak ba futuru labarik sira nian iha nasaun ne’e.

Antes hala’o misaun iha Timor-Leste, responsavel maxima Fundu Nasoins Unidas ba Asuntu Labarik ne’e hala’o ona knaar iha nasaun neen no tuir planu sei asume pasta hanesan Xefe UNICEF Rejionál iha Áfrika.

Média MAPKoms

Leave a comment

Your email address will not be published. Required fields are marked *